Sawirro-Dhagayso: Guddiga KMG ah ee doorashooyinka Puntland oo la daah furay

11 May 2016 (Puntlandes) Waxaa maanta lagu qabtay Xarunta Hay’adda PDRC Garowe Munaasabadd lagu daah furayey Guddiga KMG ah e doorashooyinka Punland

Waxaa ka qayb galay Madaxweyne kuxigeenka Puntland, Gudoomiyaha Baarlamaanka, iyo masuuliyiin kale, waxaana intay munaasabaddu laga hadlay shaqada Guddiga iyo siday dowladda iyo shacabkuba ula shaqayn lahaayeen.

Xiriiriyaha Ha’yadda PDRC Cali Faarax Farmayeeri ayaa sheegay in Munaasabadda muhiimadeedu tahay dib u billaabida geedi socodka Dimuqraadiyada Puntland, ku dhawaaqista howlgalinta guddiga doorashooyinka Puntland ee TPEC ,xiriirka Bulshada , dowladda iyo beesha caalamka.

Gudoomiyaha guddiga doorashooyinka Puntland Axmed Maxamed Cali ayaa ka hadlay muhiimada uu u leeyahay guddigan dadka reer Puntland, wuxuuna sheegay inuu yahay waddo wanaagsan oo loogu gud bi karo madaxweyne ay shacabku iyagu doortaan, oo barri la xisaabtami karaan.

Axmed Kismaayo ayaa tilmaamay in magacaabista Guddigu uu wakhti wanaagsan kusoo aaday, islamarkaana uu rumaysan yahay inay kasoo bixi karaan shaqada loo igmaday, isagoona dowladda iyo shacabkaba ka codsay inay la shaqeeyaan.

Dhagayso Gudoomiyaha gudiga doorashooyinka Puntland Axmed Maxamed Cali (A.Kismaayo)

Gudoomiyaha baarlamaanka Puntland Axmed Cali Xaashi iyo wasiirka Dasturka Cali Ciise ayaa dhankooda ballan qaaday inay la shaqayn doonaan guddiga, waxayna ugu baaqeen inay kasoo baxaan waajibaadka horyaala.

Dhagayso Madaxweyne ku-xigeenka dowladda Puntland

Madaxweyne ku xigeenka Puntland oo daah furay guddiga KMG ah ee doorashooyinka ayaa ugu baaqay inay fir fircooni muujiyaan oo wakhti ay haystaan dadka reer Puntland ku gaarsiiyaan doorashada soo socota qof iyo codkii, islamarkaana ay noqoto mid si nabad ah ku dhacda.

Camey ayaa xusay in guddigan ay yihiin kuwo xor ah oo dowladda ka madax banaan, islamarkaana ay la shaqayn doonaan.