Sawiro: Xafladd Soo dhaweyn ah oo Garoowe loogu sameeyey Raysal-wasaare Cumar Cabdirashiid

WARBIXIN+SAWIRRO : Aqalka Madaxtooyada dawladda Puntland ee Garowe ayaa caawa waxaa ka dhacday xafladd balaaran oo lagu soo dhaweynayayey raysal-wasaaraha dalka Soomaaliya Cumar Cabdirashiid Cali Sharmaarke iyo wefdiga uu hogaaminayo ee booqashada ku jooga gudaha Puntland.

Xafladaan ayaa waxaa ka soo qeyb-galay Madaxeynaha Dawladda Puntland Dr.Cabdiweli Maxamed Cali Gaas ,raysal -wasaaraha dalka Soomaliya Cumar Cabdirashiid Cali ,Madaxweyne ku xigeenka dawladda Puntland Cabdixakiin Cabdulaahi Camey ,Gudoomiyaha baarlamaanka Puntland Siciid Xasan Shire, wasiiro iyo xildhibaano katirsan Dawladdaha Puntland iyo federaalka ,isimo, waxgarad, Haween iyo Marti sharaf kale .

Furitaanka xafladda ayaa kooxda Waaberi Puntland waxaa ay soo bandhigeen Heeso Wadani ah kuwaasi oo lagu soo dhaweynayey islamarkaana lagula dardaarmayey raysal-wasaaraha dawladda federaalka Soomaaliya Cumar Cabdirashiid iyo weftigii balaaran ee uu hogaaminayo.

Madaxweynaha Dawladda Puntland Dr.Cabdiweli Maxamed Cali Gaas oo ka hadlay xafladda ayaa sheegey in uu si aad ah ugu faraxsan yahay imaanshaha raysal-wasaaraha iyo wefdiga la socda.

” Waxaan rajaynayaa in ajandayaashi ay gudiyadu kawada hadlayeen uu ka soo baxo is afgarad, raysal-wasaaraha markii aanu wada hadalnayna runtii majirto waxbadan oo aanu isku diidanahay ” Ayuu yir Madaxweyne Gaas.

Madaxweyne Gaas ayaa sheegay in muhiimtahay in maslaxada khaaska ah aan laga hormarin maslaxada guud si looga gudbo kala tafaraaruqa Soomaalida soo kala dhexgalay, waxaana uu sidookale tilmaamay in Soomaalidu isku soo laabanayso hadii alle idmo.

” Waa ay ku dhegantahay Puntland Dastuurka sababtuna waxaa weeye waa waxa ay soomaali hashiiska ku tahay, waxa lagu hashiiyeyna waa waxa dadka kala haya mar walbana loo laabanayo, isaga hadii la qalin daarana wixii lagu hashiiyey ayey wax u dhimaysaa ” Ayuu yiri Madaxweyne Gaas.

” Soomaaliya hadii larabo inay xorowdo cadowgeedana iska celiso waa inay heshaa ciidan qaran oo aan sumad qabiil laheyn, Puntland diyaar bay u tahay inay ka qeyb qaadato waana rajaynayaa in si deg deg ah loo wado, Puntland waa hooyada federaalka Soomaaliya waana dawladda federaalka katirsan oo maanta sharciga ah” Ayuu yiri Madaxweyne Gaas.

Gudoomiyaha Baarlamaanka Puntland Siciid Xassan Shire ayaa sidookale isna sheegay in lagama maarmaan ay tahay in la fuliyo dhammaan hashiisyadii hore ee ay wada gaareen Dawladda Puntland iyo Dawladda Federaalka Soomaaliya.

Raysal-wasaaraha dalka Soomaaliya Cumar Cabdirashiid Cali Sharmaarke ayaa Madaxweynaha uga mahadceliyey xafladda soo dhweynta ah ee uu u sameeyey isagoona ku amaanay dadaalka iyo horumarka dawladnimo ee uu ka wado Puntland.

Intii ay xafladdu socotay ayaa abaalmarino qaali ah si wadajir ah loo gudoonsiiyey Madaxweynaha Dawladda Puntland Dr.Cabdiweli Maxamed Cali Gaas iyo raysal-wasaaraha dalka Soomaaliya Cumar Cabdirashiid Cali Sharmaarke.

Munaasibadda lagu soo dhaweynayey raysal-wasaaraha dalka Soomaaliya Cumar Cabdirashiid Cali Sharmaarke oo booqasho rasmi ah ku jooga Puntland ayaa ugu dambeyn ku soo dhammaatay jawi wanaagsan oo ay ku dheehantahay farxad iyo reynreyn.

-DHAMMAAD-

Xafiska Warfaafinta, Wacyigelinta, Hiddaha Iyo Dhaqanka ee Madaxtooyada Puntland.